Моето срце во сите бои
Во периодот од 17 до 22 август, во Солферино, Струга, беше реализиран летен камп за деца со вродени срцеви аномалии, во соработка со „Жан Митрев“ клиника.
Активностите се реализираа според однапред подготвена програма, со цел децата и нивните родители да поминат исполнети, интересни и убави денови. Волонтерите на Црвениот крст, во координација со стручниот тим од клиниката – психолог и физиотерапевт, ги поттикнуваа децата и родителите активно да се вклучат во програмата.
Посебно доживување беше креативната работилница со Институт.мк во рамки на која децата имаа можност сами да изработуваат балсам за усни и спреј за тело, стекнувајќи нови знаења и искуства на креативен и забавен начин. Дел од кампот беа и поставувањето шатори, запознавањето со природата и првите искуства со кампување.
Преку дружењето и заедничките активности, децата создаваа нови пријателства, споделуваа радост и создаваа спомени што ќе останат долго во сеќавање, а родителите имаа простор за меѓусебна поддршка, разговор и размена на искуства.
По 15 години континуирана реализација, овој камп уште еднаш потврди дека кога сме заедно, создаваме повеќе од активности – создаваме пријателства, доверба и спомени за цел живот.
