Дневен Центар за лица со интелектуална попреченост над 18 години “Пролет”
Дневниот центар за лица со интелектуална попреченост над 18 години „Пролет“ е отворен во 2019 година, во соработка помеѓу Црвениот крст на град Скопје и Општина Центар. Центарот претставува место за поддршка, развој, социјализација и активно вклучување на корисниците во заедницата, преку разновидни едукативни, креативни, рекреативни и практични активности.
Програмата на Дневниот центар е насочена кон развивање на индивидуалните способности, поттикнување на самостојноста, стекнување нови знаења и вештини, како и подобрување на квалитетот на секојдневното живеење.
Активностите во Дневниот центар се реализираат во неколку категории:
• Креативни и ликовни активности: Изработка на рачни изработки, украси и декорации со примена на различни техники и материјали. Преку овие активности се поттикнуваат креативното изразување, фината моторика, концентрацијата и индивидуалните способности.
• Животни вештини и здрави навики: Практични работилници за развивање на самостојноста во секојдневното функционирање, кулинарски работилници, подготовка на храна, одржување лична и просторна хигиена, здрави навики и едукација за здравствена заштита.
• Музички активности и комуникација: Музички и ритмички активности, слушање музика, пеење и други содржини преку кои се поттикнуваат комуникацијата, изразувањето, креативноста и меѓусебната интеракција.
• Едукација и стекнување нови знаења: Едукативни работилници, запознавање со различни теми, учење странски јазици и активности за проширување на општите знаења и вештини.
• Социјализација, посети и излети: Организирани посети на музеи, културни и јавни институции, рекреативни излети, летни одмори и посети на други установи. Преку овие активности се поттикнува социјалната интеракција, интеграцијата во заедницата и запознавањето со културното и природното наследство.
• Еколошки и општествено одговорни активности: Еколошки акции, активности за развивање на свеста за заштита на животната средина и вклучување во иницијативи од интерес на заедницата.
Дневниот центар остварува соработка со институции, организации, компании и волонтери од клубот на млади на Црвен крст на град Скопје и волонтери од ООЦК Центар, со цел збогатување на програмските содржини и создавање нови можности за поддршка, дружење и инклузија на корисниците.
Од 2024 година, Дневниот центар „Пролет“ е официјално лиценциран од страна на Министерството за социјална политика, демографија и млади, со што се потврдува исполнувањето на пропишаните стандарди за обезбедување социјална услуга.
Работното време: понеделник – петок од 08:00 до 16:00 часот
Локација: ул. Пролет бр. 39, во близина на Веро Џамбо
Координатор на центарот: Кристина Петрова Здравковска skopje.centerck@redcross.org.mk
Контакт телефон: 071/379-119