Крводарителска акција во спомен на Тоше Проески
Традиционално, на 25.01.2016 година, по дванаесети пат беше организирана голема крводарителска акција посветена на големиот хуманист Тоше Проески во знак на одбележување на неговиот роденден.
Организатори на крводарителската акција беа Црвениот крст на град Скопје, Црвен крст Гази Баба, Институтот за Трансфузиона медицина и Тоше фан форум клубот, а поддршка дадоа и младите мотиватори од Клуб 25. Своите цвеќиња на мирот и хуманоста на дарителите ги подаруваше уметникот Живко Цветин.
И оваа година, акцијата се реализираше во холот на Дом на АРМ, а на истата крв даруваа 517 лица, од кои 125 лица за прв пат даруваа крв. Акцијата ја посети и балканската музичка ѕвезда Жељко Самарџиќ кој се заблагодари на крводарителите кои токму во спомен на Тоше на овој ден даруваат крв.
Ликот и хуманото дело на Тоше Проески се позитивен пример и поттик за многу млади личности кои токму на овој датум даруваа крв, но и мотивација за повеќекратните дарители да продолжат со хуманиот чин.Традицијата за одржување на крводарителски акции во спомен на Тоше Проески започна во 2010 година и до сега, на овие 12 акции, својата хуманост преку чинот на дарување крв ја покажале околу 4 000 крводарители.
