Активности на Црвен крст на град Скопје во летниот период
Црвениот крст на град Скопје, со поддршка на град Скопје подготви акционен план кој опфаќа теренски активности во насока на справување со евентуални топлински бранови.
Согласно искуствата од претходните години, мобилни екипи составени од лекар или парамедик ќе патролираат низ градот Скопје, ќе се дистрибуира вода, флаери со совети, ќе се мери притисок на граѓани кои ќе се пожалат на тегоби, а за потешките случаи ќе биде обезбеден и транспорт до најблиската медицинска установа или до домот на лицето. За активностите во наредниот период, ангажирани ќе бидат 40 волонтери од Тимот за одговор при катастрофи, 10 волонтери од Тимот за спасување на планина и 5 возила од кои 3 ќе патролират низ градот, а две за време на викенди ќе бидат дежурни на Планинско спасителните станици Водно и Матка.
Од понеделник (20.06) до петок (24.06) по 2 мобилни тимови ќе излезат на терен и во периодот од 11:00-16:00 часот ќе патролира низ централното градско подрачје и на поголемите автобуски постојки.
На 22.06.2016 година, започна да функционира и СОС линијата на Црвен крст, за заштита од топлотен бран, на која граѓаните може да добијат совети за заштита на своето здравје во тек на летниот период. Телефонскиот број на кој може да се јават во периодот од 11:00-18:00 ч. е 3 221 902
Тимот за спасување на планина при Црвен крст на град Скопје како и секоја година така и оваа активно се вклучува во активностите околу превенирање и намалување на штетите предизвикани од топлотниот бран и пожарите. Волонтерите од тимот, преку пропагандниот материјал ќе влијаат на свеста на граѓаните и нивните навики кога се движат низ планинските предели и во соработка со Шумска полиција во од 01.06-31.08 се активни во давање на совети како да се заштитат од топлотниот бран и да им укажат Прва помош доколку е потребно.
