Натпревар по прва помош на градско ниво
Црвениот крст на град Скопје и оваа година го организираше традиционалниот градски натпревар по прва помош за победничките екипи од општинските натпревари во категоријата подмладок (ученици од основните училишта на територијата на град Скопје). На натпреварот учествуваа вкупно 15 екипи.
Натпреварот се одржа на 2 јуни (вторник), на Средно Водно, во објектот „Даре Бомбол”.
На една од базите младите имаа можност да научат, но и да го потврдат своето знаење за основните принципи на Црвениот крст и историјатот на Црвениот крст. На друга база тие се запознаа со нови содржини поврзани со првата психосоцијална помош.
На три бази се практикуваше прва помош, при што на секоја база имаше симулација со три повредени лица и нивно соодветно згрижување.
Првото место го освои екипата од Општинската организација на Црвен крст Гази Баба од ООУ „Наум Наумовски – Борче”. Второто место го освои екипата од Општинската организација на Црвен крст Центар од ООУ „Гоце Делчев”, а третото место го освои екипа, исто така од Општинската организација на Црвен крст Центар, од ООУ „Кирил и Методиј”.
Честитки до сите учесници за покажаното знаење и ангажман. Продолжуваме да ја учиме првата помош, затоа што таа спасува животи.
