Работна средба со лицата од Украина во РСМ

Како дел од активностите насочени кон лицата од Украина кои поради воениот конфликт ја напуштија својата земја, Црвен крст на град Скопје на 29 ноември организираше работна средба со корисниците кои ги опфаќаме со нашите активности уште од 2022 година.

Целта на средбата беше да се направи осврт кон досегашната поддршка во рамки на хуманитарната асистенција што ја обезбедуваме во партнерство со УНХЦР , како и да се разговара за пристапот до права, добрите практики, предизвиците и идните потреби.

Преку отворена дискусија, присутните ги споделија своите лични искуства поврзани со пристапот до здравствени и социјални услуги, административни постапки и пристап до образование. Посебен акцент беше ставен на пристапот до пазарот на труд, како еден од најзначајните предизвици со кои се соочуваат.

Во текот на работилницата беа идентификувани клучните пречки, но и потребите кои се издвојуваат како приоритетни за наредниот период.

Овие средби претставуваат важна можност да се слушне гласот на лицата со кои работиме , и со поддршка на нашите партнери – во државата и меѓународно – да одговориме на нивните потреби, но и активно да се залагаме и да ги застапуваме нивните права.